भारत माता वाहिनी अऊ महिला कमांडो के पांच हजार सदस्य मन ल डरेस अऊ सीटी दे के घोषणा
मुख्यमंत्री डॉ. रमन सिंह हर शराब के विरोध म बालोद जिला के महिला मन के भारत माता वाहिनी अऊ महिला कमांडो के पांच हजार सदस्य मन द्वारा चलाए जावत जन-जागरण अभियान के बड़ई करनि। डॉ. सिंह हर कहिन के शराबबंदी बर अभियान चलावत ए महिला मन ल राज्य सरकार के पूरा समर्थन हे अऊ उमन ल हर संभव सहयोग मिलही। ओ मन ल निःशुल्क डरेस अऊ सीटी दे जाही। डॉ. सिंह हर ओ मन ल शराब बंदी के अभियान म सरकार के तरफ से हर संभव सहयोग के भरोसा देहे हे।
मुख्यमंत्री आज दोपहर बालोद जिला के ग्राम कुसुमकसा म आयोजित विशाल जनसभा ल संबोधित करत रहिन। उमन ए मौका म कुसुमकसा के सरकारी हायर सेकेण्डरी स्कूल के स्वर्ण जयंती समारोह म हिस्सा लीन। डॉ. सिंह हर जिला म विधवा अऊ परित्यक्त महिला मन ल सिलाई बुनाई सहित विभिन्न रोजगार मूलक काम के प्रशिक्षण दे बर 10 नवा ‘रौशनी केन्द्र’ के घलोक शुभारंभ करिन। ये नवा रौशनी केन्द्र ग्राम नालाकसा, कुमुरकट्टा, बेताल, अर्जुनी, सम्बलपुर, घुमका, अरमरीकला, कालंगपुर, देवरी अऊ रेंगाडबरी म शुरू करे गए हे। जिला म अब ए केन्द्र मन के संख्या 22 हो गए हे। डॉ. सिंह हर कुसुमकसा म आन-आन विभाग कोति ले लगाये विकास प्रदर्शनी के स्टाल मन ल घलोक देखिन।
ए मौका म उमन क्षेत्र के विकास बर 19 करोड़ 20 लाख रूपए के कई ठन निर्माण कार्य के लोकार्पण, भूमिपूजन अऊ शिलान्यास करिन। इही समें म प्रधानमंत्री उज्ज्वला योजना के तहत जिला के गरीब परिवार के ग्यारह हजार महिला मन ल निःशुल्क रसोई गैस कनेक्शन देहे के सौगात मुख्यमंत्री ह दीन। ओ मन ल कनेक्शन के संग डबल बर्नर चूल्हा अऊ पहली सिलेण्डर बांटे के शुरूआत होईस, डॉ. सिंह हर चिनहा स्वरूप 21 महिला मन ल रसोई गैस कनेक्शन दीन।
